काठमाडौं । सहिद स्मारक ए डिभिजन लिग अन्तर्गत विभागीय डर्बीको खेल बराबरीमा सकिएको छ । पहिलो चरणमा भएको त्रिभुवन आर्मी र नेपाल पुलिसबिचको खेल एक एक गोलको बरारबीमा सकिएको हो ।
त्रिपुरेश्वरस्थित दशरथ रंगशालामा पुलिसले खेलमा अग्रता बनाएपनि त्यसलाई जोगाउन सकेन् । पहिलो हाफ गोलरहित बराबरीमा सकिएको खेलको ५१ औं मिनेटमा सन्तोष हेमरमले गोल गर्दै पुलिसलाई अग्रता दिलाएका थिए । तर उसको अग्रता लामो समय टिक्न सकेन् ।
त्यसको १० मिनेटपछि विवेक बस्नेतले गोल गर्दै आर्मीलाई बराबरीमा ल्याए । खेलमा दुबै टोलीले केहि राम्रा अवसर बनाएपनि त्यसलाई सदुपयोग गर्न नसक्दा सोही नतिजा निर्णायक बन्यो । बराबरीसँगै दुबै टोलीले एक एक अंकसहित लिगको सुरुवात गरेका छन् ।
खेलमा आर्मीका सेसेहाङ आङदेङवे म्यान अफ दि म्याच चुनिए । पहिलोचरणको अन्तिम खेलमा साविक विजेता मछिन्द्र फुटबल क्लब र न्युरोड टिम एनआरटीबिच खेल हुनेछ ।
